Бу авылда мин яшим дип
Һәр кемгә сөйләп йөрим.
Күп җирләрдә булганым бар,
Тиңдәшен ләкин күрмим.
Мондагыдай табигатьне
Килеп күрергә кирәк,
Назлы хисләр бишегендә
Тибрәлә хәрбер йөрәк.
Туган авылым, Яншыгым,
Син минем җан ышыгым.
Син кыйблам тормышымның,
Алдагы язмышымның.
Инеш ага урталайга,
Аерып авылымны.
Ике якта ике урам
Кодалы, Кодагыйлы.
Туган-тумачалар монда,
Әти-әни - сөйгән яр,
Әбиләре, апайлары
Сөйкемлеләр, матурлар.
Туган авылым, Яншыгым,
Син минем җан ышыгым.
Син кыйблам тормышымның,
Алдагы язмышымның.
Тормыш кайный гел сөенеп
Авылым кочагында.
Киткән җирдә озак тормыйм,
Кайтамын очамын да.
Сандугачлар чәчәк үбә,
Күкеләр гомер саный,
Яшик әле бу оҗмахта
Мәңгегә сайрый-сайрый!
Туган авылым, Яншыгым,
Син минем җан ышыгым.
Син кыйблам тормышымның,
Алдагы язмышымның.
